Embaixadoras

"Ti podes paralos!" é a campaña de recadación colectiva ou "crowfunding" impulsada por ADEGA para poder emprender accións xurídicas contra a actual invasión eólica do país. O obxectivo é recorrer nos tribunais aqueles proxectos macroeólicos autorizados pola Xunta ou polo Ministerio de Transición Ecolóxica que supoñan un dano irreversíbel para o medio ambiente e o patrimonio natural e cultural de Galiza, ou que sexan inxustos socialmente.

 

Éxitos xa acadados

ADEGA conseguiu recentemente varios éxitos nos tribunais en contra da actual invasión eólica, como as anulacións dos parques eólicos Serra do Iribio, Campelo e Bustelo, ou a paralización cautelar do parque eólico Monte Toural, que fan parte do complexo eólico fragmentado Campelo-Bustelo-Monte Toural. Para poder afrontar as fianzas impostas polo TSXG, ADEGA iniciou unha primeira campaña "Ti podes paralos!", grazas á cal se conseguiu facer efectiva a paralización cautelar dos tres proxectos. Todos estes logros demóstrannos que, desta vez, tamén podemos conseguilo.

 

Faite embaixador/a da campaña!

Toma un papel activo nesta campaña e crea o teu propio reto #TPP. Así poderás chamar as túas seguidoras e amizades a que doen a través do teu reclamo. Estamos nun momento determinante no que cómpre defender o medio ambiente e demandar un modelo enerxético xusto, sustentábel e ao servizo do pobo e non das grandes multinacionais. Por iso, se queres seguir contribuíndo á causa, asóciate a ADEGA e únete á loita ecoloxista de Galiza.